Проект: Ентериер на стан
Категорија: Станбен објект

Морето е природен ресурс кој неретко се поврзува со релаксација и освежување. Затоа тоа е честа инспирација при проектирање на ентериери. Со внимателно одбрани материјали, текстури, бои и дезени, станбениот или деловен ентериер станува мала поморска оаза. Сината боја асоцира на мир, медитација, релаксација, инспирација, комуникација. Хармоничната композиција на сино и бело создава суштина на релаксиран животен стил и спокој, елеганција и посебен шарм.

Сината боја е основната инспирација при редизајнирање на прикажаниот станбен ентериер. Сините нијанси во просторот комбинирани со употребените земјени тонови, создаваат илузија на визуелно поголем простор. Употребени се декоративни објекти со поморски мотиви на море, бродови, рибарот и сирената. Белите камења како ѕидна облога поставeни наспроти сината ѕидна површина даваат чувство на рустикалност и пријатна атмосфера на морска пештера. Подот од природно дрво во комбинација со останатата опрема како плочестиот мебел, драперите и тепихот се во нијанси на песокот, беж, светло кафеави и златни тонови синхронизирани со сино белите композиции кои ја внесуваат свежината на морето, топлината на плажата и атмосферата на поморско патување. Камената клуб маса во овална форма поставена централно во отворениот дневен простор заедно со драматичните дрвени столбови на кои е позиционаран тв екранот, придонесуваат на визуелната тежина на внатрешниот дизајн.
Овој станбен ентериер со поморска инспирација е совршено прибежиште со релаксирачка атмосфера наспроти брзиот центарски градски живот каде е лоциран апартманот. Поморскиот стил како инспирација за дизајн на ентериери е едноставен, убав, светол и не излегува од мода, станувајќи класика. Морскиот стил на ентериери го формираат завршните материјали, декоративни објекти и користени бои. Речиси секој ентериер може лесно да се претвори во наутички или да му се даде морски акцент само со додавање на неколку декоративни перници. Затоа, во извесна смисла, овој стил на ентериери е наменет за луѓе кои сакаат да експериментираат и за креативни корисници.

Дизајн на ентериер/ 3Д визуелизација
Година на проектирање: 2019