Проект: Станбен ентериер
Категорија: Резиденцијален дизајн

Златно жолта и зелена се едни од највеселите и свежи бои кои се користат за дизајнирање на ентериери за релаксирање и секојдневно престојување, но истите и поретко се користат во модерните ентериери бидејќи е потребно храброст за нивно комбинирање. Истите тонови се употребени како акцент во просторот при проектирање на ентериерот од презентираниот стан.

Испроектирана е новокупена станбена единица, чие основно решение беше променето во распоредот на собните врати кон спалната и дневната просторија, со чија диспозиција се доби поголем функционален простор во одделните простории.
Целокупниот впечаток на отворениот ентериер од дневниот престој, како посебно издвоена партиција во станот, е кохезивна композиција со јасно издиференцирани зони за одмарање, трпезариски дел за конзумирање храна и зона за готвење. Дневната просторија е испланирана во неутрални сиви тонови, зачинети со жолти детали во синтеза со зелени елементи кои создаваат хармонија и елегантен печат на отворениот простор. Црно бел тепих со храбар дезен неочекувано е поставен како поп уметничко дело, кој радијално одблеснува во отворената просторија. Жолтата е енергетска боја, која во дневниот ентериер не е пренагласена и е внимателно употребена како суптилен допир на сивите тонови. Главниот предизвик беше позиционирање на ТВ екранот, чие крајно решение овозможи непречен флуид во просторот за движење и негово функционално користење во сите одделни зони. Отворените полици, меѓусебно огледално поставени, дополнително го украсуваат дневниот простор, а се соодветно осветлени и изработени во одбрани тонови кои му даваат визуелна длабочина на просторот. Истовремено се доби функционална кујна, комплетно опремена со сите електрични апарати по желба на сопствениците.
Новата позиција на собната врата од спалната соба овозможи да се испроектира голем плакар со многу простор за складирање. Целата спална е опремена со бел мебел дозиран со златни детали кои оддаваат нота на луксуз во просторијата. Карактерот на спалната е одреден од декоративниот ѕид кој е главната драматична визуелизација која ве пречекува при влез во собата. Ѕидот е интезивен, богат, топол, софистициран, издизајниран во црвена боја во нијанса на виното, украсен со атрактивни уметнички златни линии, кој буди многу разновидни емоции кај корисниците и посетителите на собата.
Влезната партиција е украсена со неочекуван детал од зеленило кое ве пречекува при влез во станот. Оваа зелена декорација внесува чувство на природа и модерен ентериер со спектакуларна современа ѕидна уметност. Овој тип на природни зелени декорации се сметаат за едни од најимпресивните еколошки ентериери. Првиот впечаток при влез во станот е дека се работи за пријатен и убав еколошки дом. Органски идеи за дизајн во комбинација со зелени бои изгледаат шармантно во модерните простории, повторно поврзувајќи го дизајнот на ентериерот и луѓето со природата.

Внатрешна архитектура/ дизајн на ентериер/ 3Д визуелизација
Година на проектирање: 2021
Година на реализација: 2021